「其實努力化妝，都係希望有日可以遇到個鍾意自己素顏嘅男人啫～」
呢句說話係出自我一位異性朋友 Katie 嘅口中。記得嗰晚佢人生第二次失戀，我地咁啱喺巴士上層撞見，佢喊曬咁同我分享咗佢多年嘅愛情經驗。
十六歲嗰年，佢暗戀咗一位同班男同學，為咗可以吸引到佢嘅注意，佢開始嘗試去學化妝。粉底掃、化妝棉、卸妝水……一堆陌生嘅文字就係咁樣出現喺自己世界，佢知道要學識呢門學問可能仲複雜過數學考試攞A，但為咗嗰一個男仔，無論幾困難都要學。
過程當然遇到挫敗，試過太淡俾人話冇化過，試過太濃俾人笑搽麵粉。幾經辛苦總算搵到個合適自己嘅妝，點知嗰男仔竟然轉咗校，結果一個返新界一個返港島，當時要聯絡冇而家咁方便，要發展基本上係冇可能。雖然冇咗目標，但佢仍然堅持每日化妝，原來不知不覺已經成為咗一種習慣。
十八歲嗰年，佢識到第一任男友，但呢段關係只係維持咗好短時間。佢永遠唔會忘記分手嘅原因，就係單純一次冇化妝同男友落樓下食飯結果撞到朋友，最後俾男友話影衰自己。當刻佢明白到嗰個人其實只係鍾意自己外表，鬧咗場交之後就分手收場。
二十歲嗰年，佢喺大學撞返當年暗戀嘅男同學，多年冇見佢地傾咗好耐。道別之後，Katie 心裡面其實係有絲遺憾，倘若早一個月撞見呢個男仔，或者，佢就唔會接受第二任男友嘅告白。
第二段關係足足持續咗六年，為咗呢個鍾意應酬嘅男友，Katie時刻都將自己打扮得最好最靚，但代價就係皮膚逐漸轉差。終於連男友都開始對素顏嘅自己有微言。本來佢覺得係自己問題，但原來微言只係分手嘅一個伏筆。
「佢有第三者，比我更後生更識打扮，我真係發夢都估唔到佢會咁……」
聽完Katie嘅故事之後，我遞咗張紙巾俾佢抹走淚水，佢冇意識自己喊到溶咗眼妝。但我唔介意，開始講返一個屬於我嘅故事。
「二十六歲呢年，我喺巴士上面撞到一個相識好耐嘅女仔，佢話俾我知佢分咗手。依然記得二十歲嗰年，我喺大學撞返佢嘅時候，都好黑心咁一直期待呢一日，點知一等就等咗六年。」
Katie 睜大眼，聽完相當驚訝。
「講返去十八歲嗰年，雖然嗰陣我轉校去咗港島區，但我有時都會專程返去舊校附近，睇下有冇機會撞到呢個女仔。直到有次我終於見到，但嗰女仔身邊已經有另一個男仔，所以我選擇咗放棄。仲記得，我暗戀呢個女仔嗰陣係十六歲，當時佢未識化妝，我俾呢個女仔吸引嘅，係佢願意扶婆婆過馬路嘅嗰份愛心。如果當年我鼓起勇氣告白，唔知結果會係點？」
「或者……」Katie 終於微笑起來，「就唔會轉轉折折咁多年。」
記得有人話過：女人化妝，係為咗自己鍾意嘅男人，但同時佢地追求嘅，又何嘗唔係一個鍾意自己素顏嘅男人？
（完）
【睇埋呢度～】鍾意呢個小故事嘅，不妨入去做個皮膚測試，仲即時送妳皇牌膠原自生 treatment 同 BIODERMA 缷妝水（總值$978）：
http://bit.ly/heart02
由妳嘅生活習慣，簡單分析妳皮膚情況狀態，仲有Beauty Tips幫妳解決毛孔粗大、缺水、乾紋等肌膚老化問題。其實素顏既美至係男人最愛。
＝＝＝＝＝＝＝＝＝＝＝＝＝＝＝＝＝＝＝＝＝
FB： 有心無默
個人ac：（歡迎 follow）
https://www.facebook.com/myechoofheart
IG：echoofheart
Search